2026 жылдан бастап Қазақстанда мемлекеттік жәрдемақылар мен зейнетақылар 10%-ға ұлғаяды

2026 жылғы 1 қаңтардан бастап Қазақстанда мемлекеттік жәрдемақылар мен зейнетақылар 10%-ға ұлғайтылады. Бұл шешім ҚР Ұлттық Банкі айқындайтын инфляцияның болжамды деңгейіне сәйкес қабылданған. Базалық зейнетақының ең төменгі мөлшері 35 596 теңгеге, ал ең жоғарғысы 60 005 теңгеге дейін артады.

Зейнетақы мөлшерінің өсуі

Мәселен, 2019 жылы зейнеткерлік демалысқа шыққан 70 жастағы зейнеткердің 2025 жылғы бюджеттен төленетін зейнетақысының мөлшері 171 588 теңгені құрады. 2026 жылғы 1 қаңтардағы өзгерістерді ескере отырып, оның зейнетақысы 192 816 теңгеге дейін артады, оның ішінде базалық зейнетақы 60 005 теңгені, ынтымақты зейнетақы 132 811 теңгені құрайды. Аталған сомаларға БЖЗҚ төлемдері кірмейді.

Мемлекеттік жәрдемақылардың өзгерісі

2026 жылдан бастап мемлекеттік жәрдемақылардың мөлшері де ұлғайтылады. 1, 2, 3 бала туғанда берілетін жәрдемақы 149 416 теңгеден 164 350 теңгеге дейін, 4 және одан да көп бала туғанда – 247 716 теңгеден 272 475 теңгеге дейін артады. Сонымен қатар, көпбалалы отбасыларға берілетін жәрдемақы 4 баласы бар отбасылар үшін 63 030 теңгеден 69 330 теңгеге дейін, 10 баласы барларға 157 280 теңгеден 173 000 теңгеге дейін өседі.

Мүгедектігі бар адамдарға арналған жәрдемақылар

I топтағы мүгедектігі бар адамдарға арналған жәрдемақы 101 702 теңгеден 111 872 теңгеге дейін, II топтағыларға 81 362 теңгеден 89 498 теңгеге дейін, III топтағыларға 55 474 теңгеден 61 021 теңгеге дейін ұлғайтылады. Сондай-ақ, Мемлекеттік әлеуметтік сақтандыру қорынан (МӘСҚ) төленетін асыраушысынан айырылу және еңбек ету қабілетінен айырылу бойынша төлемдер де 10%-ға арттырылатын болады.